Bethesda-Khankho Foundation

A Greeting Message For ECA Diamond Jubilee

To,

The Executive Director Evangelical Churches Association Chiengkonpang, Churachandpur 795 128, Manipur.

Krista ngailut houbung mite jouse,

Diamond Jubilee mangthei dinga i-um thei u kakipah tangeije. Hitobang eimusah u Pathen chu choi-at in umhenlang, kitah tah’a eihin puilhung lamkai jouse pachat’n umcheh u henlang, chuleh phunchellouva nungjui mipi jouse jong hamphatna chang cheh hen!

Gopi (Bamboo) akum atamchana alhoucheh cheh a aman nading atam cheh cheh bangin, eiho jong Silver Jubilee ina mujou un Golden Jubilee jong ina mutaovin, hiche ban ah tuhin Pathen puihoi vetsahna Diamond Jubilee jong ahung lhung kittan, hichetoh kilhon’n i-houbung jong Pathen in amangcha jingin ahi. Hiche jeh hin khaije! Ateh-akhang, alen-aneo chuleh ahao-avai kilungtoh tah in Pathen in eina puinau hi geldoh in kipah cheh uhite.

Gamthip-gamgo laija kona Israelte anapui galkai Pathen chun, Khul a pat in ipi-iputeo jong ahin puipeh in, aphat leh nikho kito phat kum 1910 chun Watkin Roberts mangcha in ‘Thado-Kuki Pioneer Mission’ (TKPM) ti’n Krista kipana thupha eina lhutpeh taovin ahi. Tuni hin kiloikhomna ‘KCA/ ECA’ kum 75 lhinna Diamond Jubilee mangjong leohen, Pathen in eipuihoi naoleh eimaho min ‘Kuki Mission’ pan a Krista kipana lhangsap kipatna hi kum 100 avaltan ahi. Hiche hi ihung kipatnao thudih ahin ihaimil loudiu angaije.

Hetbe dinga pha chu, kum phabep jouvin Roberts in eimaho min a mission ana pat hijongleh midang leh gamdang jong hop theina dingin TKPM chu North East India General Mission ti in anakhel in, hitobang lungput chun eihon jong Kuki Christian Association (KCA) khel in Evangelical Churches Association (ECA) ti in inakhel taovin ahi. Hiche hin Pathenthu hi eima a dingbou ahilou danleh Krista kipana thupha midang seipehding igelkhoh dan u avetsah in, hiche hi midang tamtah sanga ibolphat u thilkhat ahi. Hitia ibol jinglai uva jong ihung kipatnao thusim hohi ipai louding ahi.

Ahung lhungding kumjabi thaha Pathen lunglam ihetthei nadiu leh ihatcheh nadiu vin ‘Kuki Mission 1910’ hi ithah vet kit u angaije. Watkin Roberts in hiche mission anabol najeh pen chu ahileh, Manipur Sahlam gamkaijah American Baptist Mission toh kitho in William Pettigrew umjongleh amachu Nagaho lah a natongbou ahin, Manipur Lhanglam gamkaija Kukite lah ah missionary koima aum naipon, kei kachelou akhoh e tia eiho laha hung anahi. Hiche laija chu eiho lah a missionary ana um nailou mong ahin, sopi Nagate lah a missionary na kitoh vang kum 10 analhing dehtai. Hiche a hetdoh ding chu, Watkin Roberts chu Kukite missionary masapen anahin, chuleh a Mission bol ‘TKPM’ chu eimite jouse ding anahi tihi ahi. Hechetoh kilhona hetdoh bethei chu, tulaija eiho laha Christianity ahiding banga ahithei louna hi Manipur a missionary masahon eina khohsah loujeh uleh eiho dinmun toh kitoh a Pathen houdan anagelkhoh lou jeh u ahi.

Diamond Jubilee toh kilhona gelpat jengthei chu, Roberts in anapatdoh ahivanga anakijomjou talou, Bangladesh leh Burma gamsung changeija eima miho lah a Pathen natoh leh pankhomna suhhat ding, eimite lah a kingailut naleh pankhomna suhhat a eimaho chondan leh paodan toh kilhona Pathenthu hi ipiham ti gelkhom ding hi ahi. Midanga kingai louva Pathenthu hi eimaho dinmun toh kilhona kholdoh ding ahi. Hiche toh kilhona hetding chu Pathen’n chidang namdangho vangboh nadinga Israelte alhenchom banga, eiho jong eima dingjeng hilouva midang dinga phatchomna ihi nadiu itupdiu hi ahi. Khul a pat a eihin puijingu Pathen chu eiho Pathen ahin, eiho Pathen hi midangho Pathen jong ahijeh in mijouse toh kitoh del a uma khat leh khat kipanpi toding hi igelkhoh diu angaije.

Diamond Jubilee iman utoh kilhon in Pathen in houbung mite jouse vangboh cheh tahen!

Pakai lhacha,

Rev J Lamboi Haokip PhD