Bethesda-Khankho Foundation

Bliblical Perspective on the Role of Lay Leaders in the church (Thadou-Kuki)

THUPATNA

Houbung hi Pathen thua kiphut leh kilamkai ahijeh in, natoh dangtoh koplouva Pathenthu jil nalam leh hou natoh nalama hinkhoa kipumpeh Pathen thaonu (full-time worker/ordained pastor) hon alamkai u angaijin, milham lamkai/lay leader ho hin lamkaiho chu akithopi diudol ahi. Hichehi ipijeh ham tihi hiche paper hin aseidoh nompen ahi.

THUCHENG HILCHETNA

Hiche thu aban ingaito masangun ‘Lay’ ahilouleh ‘Lay Leader’ kiti hi ipi kiseina ham ve masao hite. Athucheng hungkon dohna Greek paochun hiche hi lao (nounce) ahilouleh laikos (adjective) akiti in hichu mipi ahilouleh ‘japi laha hungkon doh’ tina ahi. Pathen namlhen Israelte laos theous (Pathen mite) ana kiti chu hiche dungjuija hi anakiti ahi. Tulaija kiman danin Englishte paova ‘Lay’ kiti thucheng hi milham ahilouleh thepna khat dinga lhinna neilou tina ahi. Vetsah na’n, thutan a pangdinga Dan (Law) helou, ahilouleh Doctor a pangdinga damdoi helou tobang ahi. Hou kivaipohna lama seiding in ‘Lay’ ahilou leh ‘Lay Leader’ kiti hi natoh dang (profession) toh kop a pangho, houthu lamdol jil naleh hou natoh nading a kipumpeh lou ahilouleh thaonu (Clergy/pastor) hilou lamkaiho chu ahiuve.

BIBLE LEH HOUBUNG THUSIM TOH VETTOHNA

Bible thu toh vettoh dingin lay leader holeh clergy/full-time pastorho dinmun leh mopohna hi avom leh akang banga kicheh tah a khenthei ahipon, hinlah hiche vangin Bible in hichethu hi akhoh sahpoi tithei ahikitpon ahi. Avetsahna dingin, Thulhunlui lam ivetleh vaihom dingin Soul Lengte ho ana umin, houthulama Pathen leh amite kah a dingding in Eli Thempu teho ana umkit un ahi. Hiche bouseh ivetleh tahsa lam leh lhagao lam mopo dinghi kicheh taha khending hileh kilom tahin akilangin ahi. Hinlah Thulhunthah ivetleh tahsan chate jouse hi akibah chet nadiu jong akimukit in ahi. Vetsahnan, 1Peter 2:9&10 chun Krista tahsan chate jouse hi lhenchom ahidan leh leng thempu ahidan u ana seijin ahi.

Houbung thusim (Church history) a gah mudoh theiding in 16th century laichun chun Pope bouseh in thu aneiding atiuva milham ngai nahsah louva ana umjing jehchun Martin Luther in tahsan chate jouse hi Pathen thempu leh koima panpi ngailouva ama mimal cheha Pathen ahouthei ahi tin anapangin ahi. Roman Catholic leh Protestant hung kikhendohna hichejeh chu anahi. Tulai thu seidingin Church of England (Anglican) ahilouleh Church of Scotland (Presbyterian) hohin houbungah ordained minister/pastor ho bou houvai apohsah un, chutoh kilebul in Brethren (Independent) kitiho hin pastor aumsah pouvin lay leader hon houbung apokit un ahi. Hiche hohi ivetleh houbung sunga milham/lay leader ho dinmun leh kilamkai danhi mihon jat chom chom in abol un ahi. Hijongleh hiche hi inop nopa bolthei ahi tina ahipon, amun leh aphat toh kitoha khoh tah a gelkhoh ding ahi tina joh ahi.

Eiho gam ah, eiho missionary Watkin Roberts hi houbung hinsol hilouva ama macham (private) a hung ahijeh in migam houbung kivaipohdan khaotah eihin pohlut pehpouvin ahi. Ama lunglut napen chu, eiho Christian ihung hidoh diu bou anahi jehin, eiho makhoding, leiset tahsa leh lhagaova umdan ding leh gam leh go lama ingaichat hou lah a iti houbung kivaipoh dingham ti ana gelthuh joupon ahi. A ipi hileh midang semsa hilouva eima dinga phapen a kilamkaina semthei nading lampi ina honpeh u hi kipana khat ahi.

EIHO DINMUN TOH KITOH A HOUBUNG LAMKAI DING

Tulai eiho dinmun toh kitoha vetding in, lay leader ho hin houbung lamkaiho akithopi joh diu aphai. Ajeh phabep anoija hin veohite.

Ajehkhatna: Houbung kiti kiloikhomna umdan leh puidan dinghi mijousen agah hetjeng theileh agahbol jengthei ahipoi. Abula isei bangun houbung hi Pathen thua kiphut ahin, Pathenthu dungjuija kalsong dingdol ahi. Hiche nadinghin lamkaipa/nu chun Pathenthu chu ahet thuh leh ahet jaoding ban ah, tohdang toh koplouva atoh thoding angaije. Pathenthu hethuh leh hetjao kiti hi a Bible sunga kisunho chinpha toh kilhon a, akiseiho chu ipijeh a kisei ham, itihlai phat a koi kom a kisei ham, hichu midanghon-gamdanghon iti ahet uva, eihon eihoa dinga phaho iti ihetdoh diuham tiho hi ahi. Hiche boldoh nadingin houlamkai chu thepna hetna lama misanga asan ban ah, hiche mong boipi a aphatdungjuija thil kiheidan hetheimi angaije. Chuban leh houbung lamkai kiti hi vaihom leh thutan mai mai hilouva, leiset kikhel dungjui a thil hunglhung ding mu masa a, Pathenthu dungjuija mipi lampi ding ana semtoh masa thei ahi angaije.

Pathenthu toh geltoh dingchu, vetsah nan, tulai chileh nam, gam leh go, chuleh neh leh chah lama ihahsatna hou hi ahi. Hicheho jouse hi eima thanop man ham, ahilou leh mi deisah man a mohbol jeng thei ahipon, hiche ho bolding monga Pathen thaonu pastor khat in abol a, milham lamkaihon alolhin theina dinga akithopi joh diu angaije. Solchahho Thilbol (Acts) Bung Gup na ivet leh Houbung mi apunjing dungjui in niseh thil kihopna a meithai-chaga leh Gentile ho notthap in anaumji in hiche ho vetupding chun Pathen lhagaova dim leh mi kitah milham lamkai 7 (Lay leader) analhengdoh un, Jesu Krista Amatah khutnoija Pathenthu anajil seijui 12 hovangchu houlamthu a amopoh nao ana suboi pouvin ahi.

Ajehnina: Eimite dinmun leh hahsatna hohi Pathenthu toh kitoh a semphat angaije. Houbung kitihi a hou-Inn hilouva akiloikhom mihem ho joh ahijeh in tulai eiho society dinmun gelkhoh ding angaije. I-hetdiu chu, ichennao gam ah eiho jong midang sanga nemjo ina hipouvin hinlah hiche hi achesa kum 100 sungin ahung kilebul tan hiche hi hou lamkaihon gelkhoh ding angaije. Thil umdan hiti ahi:

(1) Kum 1917-1919 masang jep a pan chun British ten amaho gam huhna dingin German te anasat un, alaldiu phat in amaho galsat dingin ipu-ipateo pumtho in ana mangcha kigo un ahileh ipu-ipateo ana noplou jeh un Brtishte chun Inn leh lou kho leh veng chuleh gam le go tampi ana suhmang nungun thinglhang gama ipu-ipate thuneina jengjong analah mangpeh un, hicheho khel chun Tamenglong, Ukhrul tiho ahung kisemdoh tan ahi. Hichehi kivaihomna lama tuni chana ikiledoh lel nau ajeh khat anahi.

(2) Hitobanga British vaihomhon eina suhnem lai un, British missionary ho chun eiho lah ah Pathenthu ahin polut un kipa aumna tamjongleh thildanga eiho lhahsuhna ahidan haimil lou aphai. Akhatna ah, missionary masapen Pettigrew chu eiho lah sanga sopi dangho lah a achetah jeh in eiho lah ah Pathenthu seiding koima ana um tapon, eiho sangin midang ana khangtou masatan ahi. Kum 1910 in Watkin Roberts in Kuki Mission 1910 ahin sem in hinlah hiche jong chu ama machama hung ahijeh chun adeibangin na anatohsahthei pouvin ahi.

(3) Chuche ban ah, Roberts chu missionary dang banga thepna neileh thil musao ana hipon, hiche hojeh chun houthu/Pathenthu leh tulaija ingaichat ho ana kigeltoh khaji tapon ahi. Chuche malah in Pathen thu hi eiho chondan leh tahsa hahsatna toh kitoh loudan in ana kigelji in, hiche kah chun sopi danghon Christianity hi chileh nam kisemdoh naleh kisem pilhinna in ana neidoh un ahi hinlah eiho dingin kikhentel naleh lhah suhna in ana pangjoji in ahi.

Tulaija hou lamkai dingchun eiho dinmun leh hahsatnaho laha hi Pathenthu thupha ahina holdoha, hichu kipuijang naleh kihuh dohna a neiding ahi. Vetsahna in, Pathenthu leh eiho chondan khankho kimat dingdan, Pathenthu leh vaichat-hahsat, Pathenthu leh thildihlouva na kitongho kimat loudan chuleh Pathenthu a ikho iveng leh I society semtoh dingdan ho hi houlamkaiho mopohna ahi. Hicheho hi mijouse gahbol jengthei ahipon, natoh dangtoh kop louva Pathenthu leh hou natohna lama kipumpeh (full-time worker/ordain pastor) hon abol u angaijin, hitobang bolthei ding mi aumlou khah tahleh hiche lama lhinna neilou khat gahpansanga atongding dol miho chu semdoh ding ahijoi.

Ajehthumna: Houbung sunga Lay leader ho panmun khoh tampi aum e. Akhatna ah, Pathenthu toh kitoh a Houlamkai hon tohgon ahin gon u chu, amaho apanlou leh lolhing jou louding ahi. Achunga Solchahho thilbol imu bangun, Pathenthu dungjuija hou lamkaihon vai ahin hop phat uleh alolhin nadinga hin lamkai chu lay leader ho chu ahiuve. Hiche umding dol hi Rome Bung 12, chang 4 a chun ‘Tipum khat ah tibah tamtah ineiyui, tibah jouse thahkhat ahipoi, apannna akilbangpon ahi. Hichang chun eiho jong tamtah ihiuvin, Christa a tikhat ihiuve; khat chu khat tibah ihi cheh un ahi’ tin ana seije.

Hiche toh kilhona hetding chu, ordained pastor ahilouleh Biblejil jouse chu Pathen lama lhina neileh lamkaidia tahsan um hicheh kitlou maithei ahi. Vangset aumleh koima cha aum loupet khangjong umkha thei ahije. Tulai thil umdan ivetleh pastor koitobang khat chu atohkhompi toh kito loujeh in houbung chom asemdoh theijin, lamkai nom jehleh sum leh pai holnom najeh ahilouleh phung le chang, chileh nam ngailutna injong houbung akisemdoh theijin ahi. Hicheho toh kibang jeplouvin, hou natong mi abangkhat chu guhthima government natong anahija natong louva lhalo ana kilah jing jong ana umkhathei kit ahi.

Milham lamkaiho panna ding khoh tah khat chu, chutobang houlamkai aum tah leh asosal diu ahi. Houlamkai tosot kiti chu amaho seisei moh juijui ding ahipoi. Houlamkai lhemho chu Pathenthu toh kitoha sosal ding ahi. Houlamkaihon Pathenthu atuhchah uva, thingam a adinpi ngam diu angaije. Achuti louleh lamkai dinga lhinglou ahiuvin, chuche jeha chu mipi vangsetna alhungsah thei u ahi. Tulaija eiho houbung leh society dinga khoh chu Pathenthu toh kitoh louva natongleh lamkaiho kidinte piding tihi ahi. Houbung chu Pathen a ahileh alamkai holeh anungjui jousen Pathenthu dungjuija apuidiu ahi.

THUCHAINA

Thu tampi isei taovin, hinlah I-seinom pen u chu hiche hi ahi - Houbung hi Pathen thua kiphutdoh ahin Pathenthu toh kitoha cheding ahi. Hiche nading hin houbunghi natoh dangtoh koplouva Pathenthu leh houlam natongdinga ahinkhoa kipedoh Pathen thaonu pastorho chun alamkai diu angaijin, milham lamkai holeh adangsen atosot cheh ding ahi. Houbung sunga milham lamkai (lay leader) ihikhah a houbung ingailut leh alamkaipen a panjeng louding, ihamtia ipankhah jengtah jongleh ikhelding semdoh loiding eima dinga thilpha leh Pathen lunglhaina hijoding ahi.

Revd J Lamboi Haokip PhD, St George’s-Tron, Church of Scotland, Glasgow, UK.