Bethesda-Khankho Foundation

Christmas Message

Bible toh kitoh dingin, Jesu Krista hi Kuki khosung khat’a pieng anahileh mihousa/Haosa insung ahidem ahilou leh mivaicha/kho-chaga insung anahidem? Ahilouleh India gam lailunga piengding hitaleh ‘Nam len kahiuve’ ti Brahmin ho insungah apiengdem ahilouleh tohkhah theilou khop’a nam nem Dalit/Scheduled Caste ho insungah leh apiengdem?

Hiche dohna hi donbut tei teiding hitaleh ‘Jesu Krista hi milen milal insung sangin mivaicha/kho-chaga ahilou leh nam nem Scheduled caste ho insungah ana pieng inte’ kitileh Bible a Jesu Krista pendol kisun toh kinailam pen inte. Hiche hi Pathen in mihousa, milen-milal ho angailupoi tina hilouvin, eimading hagel jeh’a mivaicha genthei ho donlouva aumji hi Pathen dei ahipoi tina ahi. Eiho condan toh kitoh a seiding in ‘Khankho hetlou hi’ Pathen deilou chonset ahi tina ahi. Hiche thu umdan kichen jep in veohite.

Jesu Krista pendol kisutnaho (Mathew 1:18-2:12; Luke 2:1-20; John 1:1-18) ivet leh Jesu chu mihousa, leng le lal te sangin, mi noise a um vaicha-gentheiho toh ana kinai dehset in ahi. Vetsah na’n, Mathew 1: 1-17 sunga Jesu ahungpenna khanggui ivetleh numei 5 (nga) min akimu in, hiche holah ah Mary bouseh chu mipi deisah nungah theng ahin, adangho hi ‘nam nem’ (gentile mi), abang jineisa (Ruth, v. 5), abang mi kitahlou muset’a um (Tamar, Gen 38:6-30; Rahab, Joshua 2:1; leh Bethseba, 2 Samuel 12:1-24) ahiuvin ahi. Hiche ban ah, Jesu ahung pen chun mihousa, leng leh lalho inn sangin Bethlehem Bong-Inn sungah ana pengin ahi (Luke 2:7). Ahung khanlet jou nungin jong Jesu chun mi noise a um, vaicha gentheiho ana khohsah lheh in - Chi leh nam thudol’a noise a anaum Samaria numeinu kom ah donding twi anathum in (Jn 4: 1-42); Kum 38 jen panpi ding neiloujeh a damlouva Bethsaida twikul panga Nakong chatmo pa ana damsah in (John 5:1-18); Numei ahijeha ana kichom engbol, ajonpet taha kiman numeinu chun ‘Numei nasuh khel akingaidam tai, ki chetan, chonset vang nungbolkit tahih in’ tin analha doh in ahi (John 8:1-20). Hicheho hi ivetleh Naosen Jesu hi mijouse dinga hungpeng hijongleh suhgentheija umho ding ahidehset in ahi.

Pathen in suhgentheija umho akhoto dan hi Potdoh Bu (Exodus) ah jong akichen in ahi. Aigupta mite khut noija Israelte khang tamtah soh le sal’a ana um uva, migam’a aji-achateo chuleh anei le gou gancha chunga jong thu neijou talou, achi leh anam (identity) u jong mangthei ding khop a aumphat un Pathen in Mose mangcha in Isrealte chu ana huhdoh in, amaho dingin gamkhat anape tan ahi. Hiche hi Pathen in mihem alhagao bou velouva atahsa, alungthim, neh le chah, sil le chen chuleh achen nading gam le go agelkhoh pih dan akimu in ahi. Hiche hangsan tah’a akisei theina kit khat chu ahileh Jacob chun phung somle ni vahcheh ho hengah lekha anathot in ‘Pathen santhei houdan dih leh nolna bei chu nulou-palou ho agenthei naova vil a kithopia, vannoi kisuhboh sahlou chu ahi’ anati in ahi (James 1:27). Solchah Paul jongchun Jesu Krista nemtah a ahungpen nathu umdol hitihin anaseijin ahi: ‘Ajehchu Ama vaichat vanga nangho nahaodoh theina dinguva, ahaosanasa nangho jala vaicha jeng ahi’ anati’n ahi (2Corinth 8:9).

Achunga Jesu pendol ivetnao vah, Pathen amatah in akhut’a asemsa mihem lim’a ahungpen a, mihem lah a jong anem nungpen pen ho insunga ahungpen hi Pathen in suhgen theija umho leh mi noisea umho apanpi chom e tina ahi. Ajatchom jepa seiding in, ‘Pathen in adeilou chu amadingbou gel’a midang khankho ding gellou ho’ chu ahi. Pathen in Amalim bang banga asem mihem jouse hi koima kichombolna umlouva, kibangchet leh kichamdela umding hi Pathen lunglhaina ahi. Jesu Bong-Inn sunga ahungpen hi suhnem’a umho kihuhdoh nadingleh mihem sugentheiho kisosalna ahi. Hijeh hin Christmas hi thil kilebul (Revolutionary event) lopna ahi tithei ahi. Eiho lah a koiho hi Pathen lungdeibol hija, koiho hi abol lou ham? Suhgentheija umho ngailu dehset Naosen Jesu hi i-khosunga hungpeng ding hitaleh eima insung ah apengnom nadem? Hiche dohna donbut cheh ding hileh mijouse’n Pathen lungdei kabol e iti chehdiu ahi. Hinlah, Jesu pen umdol ivet leh Pathen na katonge kiti jongleh mivaicha gentheiho ipanpi nomlouva, panpi sanga amaho nehding leh chanding lahpih a eima inle lou, neile gou kisem a midang hina japihlou (violation of human rights) chu Pathen deilou bol anakihi jothei ahi.

Hiche jeh hin Christmas mangdinga ikigot jinglai uhin, Jesu hi koiham, ipijeha hung pengham, apen iti lamto dingham, amalunglhaina kahi ding hinam tiho hi khohtah a igelcheh diu aphai. Hichea themmo chanlou nadingin, ‘Jesun angailut dehset migenthei, mivaicha ahilouleh nulou-palouho nehding kana lahpih khah em’, ‘kanei-kagou ho hi keima chanding mong anahinam ahilou leh michan ding kathim lahpih um em’, ‘midangding gellouva keima dingbou kaki vet khah em’, ‘Christmas mangdinga kaheng kakom panpi ngaiho kapanpi kigot hinam tiho hi eima leh eima anakidoh masah ding aphai. Achutilou leh Jesu pen alop jinglaija Ama douva anakipang thei ahi.

Jesu Krista hungpen hi MIJOUSE’N tua pata tahsa leh lhagaova hinna aneipat uva, tonsot geija akineiden thei nadiuva hung peng ahi. Eiho dinmun toh teding hitaleh, mihemkhat hina dola khosung/gamsung mijouse kibangcheta aumthei nadingleh, mijousen adeibang cheha Pathen ahouthei nadiuva Jesu Krista chu kho-chaga lah a jong anemnung pen’a hungpeng ahi tithei ahi (Kho-chaga, ahilouleh namnem, tia kivetchom naho suhbei nadinga Jesus chu kho-chaga nemnung pena hungpeng ahi tiding hinte). Hijeh hin eima mimal hinkho, i-nehle chah holdan, ihoubung boldan leh Pathen natohdan u, khosung kivaipohdan, government service boldan, government scheme mudan, ‘revolutionary movement/nampi natoh dan’ i-boldan hou vepha kit uhite. Vaicha-genthei ho joubol/ bolse hih in, amaho lah a chu Jesu Krista jong anajao khathei ahi.

Revd Dr J Lamboi Haokip 7Knightwood Court, Glasgow, UK. December 15, 2011.