Bethesda-Khankho Foundation

HOUBUNG HI ORDAINED PASTOR HON A LAMKAI DING AHI (In Thadou-Kuki)

THUPATNA

Houbung hi Pathen thua kiphut leh kilamkai ahijeh in, natoh dangtoh koplouva Pathenthu jil nalam leh hou natoh nalama hinkhoa kipumpeh Pathen thaonu (full-time worker/ordained pastor) hon alamkai ding, milham lamkai/lay leader ho hin lamkaiho chu akithopi joh diu angaije. Hichehi ipijehham ti hiche paper hin avetsah nom pen ahi.

THUCHENG HILCHETNA

‘Lay’ ahilouleh ‘Lay Leader’ kiti hi ipi/koiho kiseina hitantem? Athucheng hungkon dohna Greek paochun hiche hi lao (noun) ahilouleh laikos (adjective) akiti in hichu mipi ahilouleh ‘japi laha hungkon doh’ tina ahi. Pathen namlhen Israelte laos theous (Pathen mite) ana kiti chu hiche dungjuija hi anakiti ahi. Tulaija kiman danin Englishte paova ‘Lay’ kiti thucheng hi milham ahilouleh thepna khat dinga lhinna neilou tina ahi. Vetsah na’n, thutan a pangdinga Dan (Law) helou, ahilouleh Doctor a pangdinga damdoi helou tobang ahi. Hou kivaipohna lama seiding in ‘Lay’ ahilou leh ‘Lay Leader’ kiti hi natoh dang (profession) toh kop a lamkaija pangho, houthu/Biblethu lamdol jil naleh hou natoh nading a kipumpeh/full-time lou, ahilouleh thaonu (Clergy/pastor) hilou lamkaiho chu ahiuve.

MUNDANG LEH PHATDANGA HOUBUNG LAMKAI KIBOLDAN Bible thu toh vettoh dingin lay leader holeh clergy/full-time pastorho dinmun leh mopohna hi avom leh akang banga kicheh tah a khenthei ahipon, hinlah hiche vangin Bible in hichethu hi akhoh sahpoi tithei ahikitpon ahi. Avetsahna dingin, Thulhunlui lam ivetleh vaihom dingin Soul Lengte ho ana umin, houthulama Pathen leh amite kah a dingding in Eli Thempu teho ana umkit un ahi. Hiche bouseh ivetleh tahsa lam leh lhagao lam mopo dinghi kicheh taha khending hileh kilom tahin akilangin ahi. Hinlah Thulhunthah ivetleh tahsan chate jouse hi akibah chet nadiu jong akimukit in ahi. Vetsahnan, 1Peter 2:9&10 chun Krista tahsan chate jouse hi lhenchom ahidan leh leng thempu ahidan u ana seijin ahi.

Houbung thusim (Church history) a gah mudoh theiding in 16th century laichun chun Pope bouseh in thu aneiding atiuva milham ngai nahsah louva ana umjing jehchun Martin Luther in tahsan chate jouse hi Pathen thempu leh koima panpi ngailouva ama mimal cheha Pathen ahouthei ahi tin anapangin ahi. Roman Catholic leh Protestant hung kikhendohna hichejeh chu anahi. Tulai thu seidingin Church of England (Anglican) ahilouleh Church of Scotland (Presbyterian) hohin houbungah ordained minister/pastor ho bou houvai apohsah un, chutoh kilebul in Brethren (Independent) kitiho hin pastor aumsah pouvin lay leader hon houbung apokit un ahi. Hiche ahivangin Brethrenhon houbung sungah numei lamkai in apansah kitpouvin, hinlah Anglican leh Presbyterian hon numei jong lamkai in apansah kit un ahi. Hiche hohi ivetleh houbung sunga milham/lay leader ho dinmun leh kilamkai danhi mihon jat chom chom in abol un ahi. Hijongleh hiche hi inop nopa bolthei ahi tina ahipon, amun leh aphat toh kitoha khoh tah a gelkhoh ding ahi tina joh ahi.

Kukite lah ah, Pathenthuhi kotpi lam hilouva kotcha lama pat a hunglut ahijeh in houbung kivaipoh dingdanho jonghi eiho dinmuntoh kitohin giltah in ana kigelkhapon ahi. Manipur gama missionary masapen William Pettigrew ngaisahpen inahilou jeh uleh eimaho Kuki missionary, Watkin Roberts lunglutna pen kivaipoh nalam anahi loujeh in kivaipohna lamah lhahsamna lentah ana um in ahi.

EIHO DINMUN TOH KITOH A HOUBUNG LAMKAI DING Tulai eiho dinmun toh kitoha vetding in, houbung lamkaipen dinghi ordained pastor khat ahia, upa/deacons/deaconess holeh milham lamkaidangho hin houbung lamkaiho akithopi joh diu aphai. Hiche ahinading ajeh phabep aume.

Ajehkhatna: Houbung kiti kiloikhomna umdan leh puidan dinghi mijousen agah hetjeng theileh agahbol jengthei ahipoi. Abula isei bangun houbung hi Pathen thua kiphut ahin, Pathenthu dungjuija kalsong dingdol ahi. Hiche nadinghin lamkaipa/nu chun Pathenthu chu ahet thuh leh ahet jaoding ban ah, tohdang (service dang) toh koplouva atoh thoding angaije. Pathenthu hethuh leh hetjao kiti hi a Bible sunga kisunho chinpha toh kilhon a, akiseiho chu ipijeh a kisei ham, itihlai phat a koi kom a kisei ham, hichu midanghon-gamdanghon iti ahet uva, eihon eihoa dinga phaho iti ihetdoh diuham tiho hi ahi. Hiche boldoh nadingin houlamkai chu thepna hetna lama misanga asan ban ah, hiche mong boipi a aphatdungjuija thil kiheidan hetheimi angaije. Chuban leh houbung lamkai kiti hi vaihom leh thutan mai mai hilouva, leiset kikhel dungjui a thil hunglhung ding mu masa a, Pathenthu dungjuija mipi lampi ding ana semtoh masa thei ahi angaije. Pathenthu toh geltoh dingchu, vetsah nan, tulai chileh nam, gam leh go, chuleh neh leh chah lama ihahsatna hou hi ahi. Hicheho jouse hi eima thanop man ham, ahilou leh mi deisah man a mohbol jeng thei ahipon, hiche ho bolding monga Pathen thaonu pastor khat in abol a, milham lamkaihon alolhin theina dinga akithopi joh diu angaije. Solchahho Thilbol (Acts) Bung Gup na ivet leh Houbung mi apunjing dungjui in niseh thil kihopna a meithai-chaga leh Gentile ho notthap in anaumji in hiche ho vetupding chun Pathen lhagaova dim leh mi kitah milham lamkai 7 (Lay leader) analhengdoh un, Jesu Krista Amatah khutnoija Pathenthu anajil seijui 12 hovangchu houlamthu a amopoh nao ana suboi pouvin ahi.

Ajehnina: Eimite dinmun leh hahsatna hohi Pathenthu toh kitoh a semphat angaije. Houbung kitihi a hou-Inn hilouva akiloikhom mihem ho joh ahijeh in tulai eiho society dinmun gelkhoh ding angaije. I-hetdiu chu, ichennao gam ah eiho jong midang sanga nemjo ina hipouvin hinlah hiche hi achesa kum 100 sungin ahung kilebul tan hiche hi hou lamkaihon gelkhoh ding angaije. Thil umdan hiti ahi: (1) Kum 1917-1919 masang jep a pan chun British ten amaho gam huhna dingin German te anasat un, alaldiu phat in amaho galsat dingin ipu-ipateo pumtho in ana mangcha kigo un ahileh ipu-ipateo ana noplou jeh un Brtishte chun Inn leh lou kho leh veng chuleh gam le go tampi ana suhmang nungun thinglhang gama ipu-ipate thuneina jengjong analah mangpeh un, hicheho khel chun Tamenglong, Ukhrul tiho ahung kisemdoh tan ahi. Hichehi kivaihomna lama tuni chana ikiledoh lel nau ajeh khat anahi. (2) Hitobanga British vaihomhon eina suhnem lai un, British missionary ho chun eiho lah ah Pathenthu ahin polut un kipa aumna tamjongleh thildanga eiho lhahsuhna ahidan haimil lou aphai. Akhatna ah, missionary masapen Pettigrew chu eiho sanga sopi dangho lah a achetah jeh in eiho lah ah Pathenthu seiding koima ana um tapon, eiho sangin midang ana khangtou masatan ahi. Kum 1910 in Watkin Roberts in leiset chunga ana umkhalou ‘Kuki Mission’ ahin sem in hinlah hiche jong chu ama machama hung ahijeh chun adeibangin na anatohsahthei pouvin ahi. Chuche ban ah, Roberts chu missionary dang banga thepna neileh thil musao ana hipon, hiche hojeh chun houthu/Pathenthu leh tulaija ingaichat ho ana kigeltoh khaji tapon ahi. Chuche malah in Pathen thu hi eiho chondan leh tahsa hahsatna toh kitoh loudan in ana kigelji in, hiche kah chun sopi danghon Christianity hi chileh nam kisemdoh naleh kisem pilhinna in ana neidoh un ahi hinlah eiho dingin hitobang chu ana hijou tapon ahi.

Tulaija hou lamkai dingchun eiho dinmun leh hahsatnaho laha hi Pathenthu thupha ahina holdoha, hichu kipuijang naleh kihuh dohna a neiding ahi. Vetsahna in, Pathenthu leh eiho chondan khankho kimat dingdan, Pathenthu leh vaichat-hahsat, Pathenthu leh thildihlouva na kitongho kimat loudan chuleh Pathenthu a ikho iveng leh I society semtoh dingdan ho hi houlamkaiho mopohna ahi. Hicheho hi mijouse gahbol jengthei ahipon, natoh dangtoh kop louva Pathenthu leh hou natohna lama kipumpeh (full-time worker/ordain pastor) hon abol u angaijin, hitobang bolthei ding mi aumlou khah tahleh hiche lama lhinna neilou khat gahpansanga atongding dol miho chu semdoh ding ahijoi.

Ajehthumna: Houbung sunga lay leader upa/deacon/deaconess leh milham lamkai ho panmun khoh tampi aum e. Akhatna ah, Pathenthu toh kitoh a Houlamkai hon tohgon ahin gon u chu, amaho apanlou leh lolhing jou louding ahi. Achunga Solchahho thilbol imu bangun, Pathenthu dungjuija hou lamkaihon vai ahin hop phat uleh alolhin nadinga hin lamkai chu lay leader ho chu ahiuve. Hiche umding dol hi Rome Bung 12, chang 4 a chun ‘Tipum khat ah tibah tamtah ineiyui, tibah jouse thahkhat ahipoi, apannna akilbangpon ahi. Hichang chun eiho jong tamtah ihiuvin, Christa a tikhat ihiuve; khat chu khat tibah ihi cheh un ahi’ tin ana seije.

Hiche toh kilhona hetding chu, ordained pastor ahilouleh Biblejil jouse chu Pathen lama lhina neileh lamkaidia tahsan um hicheh kitlou maithei ahi. Vangset aumleh koima cha aum loupet khangjong umkha thei ahije. Tulai thil umdan ivetleh pastor koitobang khat chu atohkhompi toh kito loujeh in houbung chom asemdoh theijin, lamkai nom jehleh sum leh pai holnom najeh ahilouleh phung le chang, chileh nam ngailutna injong houbung akisemdoh theijin ahi. Hicheho toh kibang jeplouvin, hou natong mi abangkhat chu guhthima government natong anahija natong louva lhalo ana kilah jing jong ana umkhathei kit ahi.

Milham lamkaiho panna ding khoh tah khat chu, chutobang houlamkai aum tah leh asosal diu ahi. Houlamkai tosot kiti chu amaho seisei moh juijui ding ahipoi. Houlamkai lhemho chu Pathenthu toh kitoha sosal ding ahi. Houlamkaihon Pathenthu atuhchah uva, thingam a adinpi ngam diu angaije. Achuti louleh lamkai dinga lhinglou ahiuvin, chuche jeha chu mipi vangsetna alhungsah thei u ahi. Tulaija eiho houbung leh society dinga khoh chu Pathenthu toh kitoh louva natongleh lamkaiho kidinte piding tihi ahi. Houbung chu Pathen a ahileh alamkai holeh anungjui jousen Pathenthu dungjuija apuidiu ahi.

TULAI HOULAMKAI THEMMO CHANNA DING

Pathenthu kholthuh loujeh. Pu Hou-Pa Hou dalha a thipi/hinpi dinga Christian houdan hinjui ihitah jeh un, ‘Pathenthu ahi’ tia ihetho/ijuiho hi giltah a vet angaije. Pathenthu kiti hi ipi ham, ipi pi ahopham ti ihettoh lou uleh Pathen thu ahi tia iseihou hin khonunga dinga hahsatna eihin lhutpih joh diu ahi. Ajatchom jep a seidi’n, Pathenthu ihetdih uleh ikihinso diu, ihetdihlou uleh imanthah diu tina ahi.

Eiho hetna leh chihna tamnei nailou ihina ban uvah, atamjo Christian ihidoh tah jeh un eiho lah a Pathen thusei kiti hi thil kipa umleh tijat um kigom thilkhat ahi. Achunga ivetdoh u, Pathenthu lhingjep a akisei loujeh a ichon dan leh ithusim chuleh igam leh go aneo jep jep a, eiho ding a hahsatna asan cheh cheh ho hi avetsahna ahitai. Hiche hi Mikangte ham, ahilou leh gamla tah a umho sei sei moh lah lah ding tina ahi kitpoi. Amaho Pathen leh eiho Pathen kibang ahi. Bolding joh chu, leiset chunga midang in Pathen iti amua, amaho hetdan leh ahinkhouva ato dan hou eiho a toh iti am tia suhto ding, hichea kon a chu eima dinmun a kipana eipe thei Pathenthu chu ipi ham tia holdoh ding tina ahijoi.

Kidoh ding chu, Pathenthu itiu hi ipi ham, hichu midang din kipana thu ana hijongleh tulaija eiho dinmun leh hahsatna muna kipana thupha iti hung hidoh dingham tiho hi ahi. Hichehi Pathenthu akikhel theije tina ahipon, leiset kikhel jinglaha Pathenthu hi aphatjousea ‘kipana thupha’ ahidan vetdoh ding tina ahi. Ajatchoma seidingin, eiho kikhel jongleo hen Pathenthu akikhel loudan vetsah ding, aphat dungjuija eiho dinga kipana thupha ahidan kholdoh jingding tina ahi. Hiche nading hin, Bible thu hetgil angaijin, chuban leh leiset thil umdanho jong hetjing angaije. Hiche jeh hin, Pathen thu jilding leh Houbung lamkai dinghi tohding mu joulou man hilouding, chihna hetna jouse toh kitho a bolding ahi. Hiche hi adeh in Bible jilho leh jildinga kigonghon khoh tah a gel a, ihet chetlou leh khongai tahdi eima dinga phajo ding ahi (Ven, Eli thempupa chate bolkhelna. 1 Samuel 2:12-36).

Thusim thahsut loujeh - Tuni chan’a eiho thusim kisun hohi midangho mudan ahin, hiche hi eima ho mudan’a ithah sut u angaije. Amasa pen in British vaihom hon ana sun un, aban in missionary hon ahin sun jom kit un, athum veina in India mithem (Anthroplogist) hon ahin sun kit un ahi. Amaho vetdan in eiho hi mi nungdel, nam nem ti in ana mu un, ichon dan jatchom ho jong vet hoi asah tho un, aman lut dan ana hepouvin ahi.

Hinlah eiho mudan a vetding in ithu sim u hin Pathen mapui ichan nao avetsah e. Pathen chun, Khul’a pat a tuni chan a eina pui jing u ahi. Hiche jeh a hi ithu sim u hi ‘Kuki Uprising 1917-1919’ jeng hilouva, ‘Kuki Mission (1910)’ a kona jong vetding ngai ahi. Hiche velvetna a holding chu, Pathen in ichan geija eingailut uva, eiho ding jeh a missionary ho mangcha a na antoh em ti ikhol u angaije. Tulai a eiho thusim atamjo hi ‘Kuki War of Independence’ 1917-19 (Dr. T. S. Gangte suhtoh dan) a kon a kisei ahin, hiche hi achunga isei u ‘Kuki Mission (1910) toh vetkhom ding ahin, hiche aumdoh joulou hi i-missionary pau (Roberts) sang a, eimaho, ahidehseta lamkaiho lhinlelna khat hijo dingin akilang e.

Geldinga khoh chu, achesa a Pathen in eina bolpih hou hi ipijeh ham, Pathen in ipi eina deisah pih uham tia kidoh angaije. Pathen gon ahilou leh Roberts chu eiho lah a hung lou hel ding ahi ti tahsan aum e. Adeh in, amahi inchunga khuding song khoh a (slate quirer) kivah mi ana hi in, gam ningchonga kon, koima het phah hilou mi khat ana hi in ahi. Amahi 1908 a chu Keswick Convention (Britain a Evangelical ho khoppi) a aga che na a, Mizoram a Medical missionary Dr Peter Fraser thusei chu aga jah doh khah a, hichea a chu Pathen kouna hung chang kha ahi. Chuban ah, Mizoram ahung lhun jouva Senvon Haosapun ana thot Bible tadoh nading sum jong chu, ginchat umlou tah mi khat in ahin thot ana hi kit in ahi.

Hiche ho hi ivet vet leh Pathen in eiho dinga hi lung tup khat aneihin hinte tihi tahsan um mong ahi. Hichu ipi ana hita dem? Tun jong ana umjing nalai dem? Aum jing nah lai leh iti kinung mudoh kit thei ding ham tiho hi gelding aphai. Leiset akikhel jing in, tua jong hung kikhel peh ding ahi nalaije. Tua bon hi hung kiha khel gang cheh nalai ding ahi. Hiche thil kikhel ho lah a det tah a din jou nading un, achesa a Pathen in iti eina pui uham ti hetjing angai jin, hiche a bul kiphu pum a thil thah ho chu kilah khom ding ahi. Abul aum lou leh aleh umthei lou ding ahi.

Thu kaimat loujeh: Pathen houvang a tahsa thudol gelda jeng louding ahi. Pathen thu leh tahsa thu, achesa leh tulaipat, tulaiphat leh khonungding thuho hi kaimat ding ahi. Kaimat ding tichu, Pathen thu manga tahsa ngaichat bolding, ahilouleh tahsa ngaichat deina jeh a Pathenthu idei dan dan a seiding tina ahipoi. Pathenthu toh kitoh a, tahsa thudol ho gelkhoh ding tina ahi. Mihem kiti chu Pathen in amalim bang banga asem (Ven, Semtilbu 1:27),tahsa a chu hing ahijeh a, hiche tahsa hintongkhathei /hin susetheiho chu Pathen ngaikhoh ahi ti het a, thudih ngaikhoh a dinpi ding ahi. Pathen hou kiti hin tahsa-lhagao, inchen-lou chen, mipi leh mimal, chuleh thing le song thilsem jouse geija agelkhoh ding, Pathen houvanga jong i-thusim leh chondan moh paiding hilou, geltoh louva moh lah lah dingjong hikit dehlou ahi. Thilho hi lampi chom choma kona vettoh a, Pathen hou hin tahsa leh lhagaova hin naleh kipana eihin lhutpeh diu ngai ahi. Hichena dinga hi Houbung lamkaiho chun, thilho hi aning akah avettoh uva mipi meivah a puibanga apuidiu angaije.

Hetding chu, eiho society a mi atamjo Christian ihitah jeh un, ‘Pathenthu ahi’ tia iseiho hin thil asemphat dehset /asuhset dehset thei ahi. Achunga kumjakhat sunga thil kikhel iseihou jong hiche jeh hi ahi. Gahseibe jep ding in, achesa kum 1980s vel a pat’n I-gam sung ah Penthahna/lhagao lam hinkho ha tah in ina sei un kipa aum in ahi. Hinlah, Penthah jouva leiset kivaihomna lama iti panlah dingham/louding ham, chenkhompi sopi dangho toh kichamdel a iti chenkhom ding ham, eima chondan manglouva iti Pathen houding ham tiho ina gelkhoh pouvin ahi. Hiche lhinlel nachu, chutobang a lungmong tah a iumlai un, chenkhompi dangho gam le go delna jeh in, i-gam u tampi leh hinkho tampi ina chaan taovin ahi. Hiche ban’a khohche chu, kihuhdohna ding ti’n, abangin ‘Nampi Sepai’ ti in, hem leh thal choijin ina pang un, hichun ajona in eiho lah ma ma ah, kitha kimat, hunam a thilbol leh thal thahatna lampi ahin semdoh kit tan ahi.

Hitobang chonna hi Ipi-ipute chondan hilou, chuleh eiho Christian chondan jong hikitlou, gam le go boijeh a hung pengdoh ahin, hiche hi Christianity leh eima chondan hotoh vettoh a, thalchoi le choilou ibon uva ivet khomdiu ahinalaije. A ipi hileh iseinom u chu, Houthu leh tahsa thudol aki kahmat todan leh hicheho chingthei tah a kaimatlou akhoh dan thu ahi. Tripura gama isopi hou hahsatna a kon’a kihil ding aphai. Tripura gamneite khu Britishte phatlaija Kuki ana kiti ahiuve.Hinlah amaho milungthima analhah jehuva Hindu anahikhah tahjehun, tuhin amaho gamsunga thuneina midang anachangtan, agamneite mikhutnoijah gentheitahin anaum taovin ahi. I-chih theilouva houbung kiloikhom nahi apoding dolin apoh louleh Houthu hi khamnathei kiboltoh hung bang thei ahi.

THUCHAINA

Nikho, phat leh mihem lunggel kikheldan agan behseh tahjehin houbung kipoh danjong akikhel jepding angaije. Chuban leh, Houbung hi Pathen thua kiphutdoh ahin Pathenthu toh kitoha cheding ahi. Hiche nading hin houbunghi natoh dangtoh koplouva Pathenthu leh houlam natongdinga ahinkhoa kipedoh Pathen thaonu pastorho chun alamkai diu angaijin, milham lamkai holeh adangsen atosot cheh ding ahi. Houbung sunga milham lamkai (lay leader) ihikhah a houbung ingailut leh alamkaipen a panjeng louding, ihamtia ipankhah jengtah jongleh ikhelding semdoh loiding eima dinga thilpha leh Pathen lunglhaina hijoding akilange.

Asun: J Lamboi Haokip. 1 Bellgrove Street, Glasgow, UK. 7th May, 2013.