Bethesda-Khankho Foundation

KWSG Hou-In Lut Kipa Thuthot

Kuki Worship Service, Gauhati in kilungtoh tah a Hou-In anasah doh uva, tua akot honthei ding aumhi ikipahcheh uve – hiche jeh hin Pathen chu vahchoijin umjo tahen!

Kum jakhat masang a ipi-iputeovin, eima chondan leh houdan manga chamlhat tah a hinkho anaman laijun Britishten kigongtoh manlouvin anakhel peh un, Haosa a kivaipoh khel in amaho ana kitungun, chuleh pu hou-pa hou Christianity in ana khel peh taovin ahi.

Hiche kikhelna hi alhangpi’n thilpha tah in kigel jongleh avaihom thah British/Americanho lailah ina chan joulou jeh un hamphatna ichanding dol u ina changjong pouvin ahi. Midang in missionary khat cheh ana neilaija eihon khatjong neilou, vaikhonung keija eiho ngailut jeh’a ‘Thadou-Kuki Pioneer Mission’ tia hunglutpa Watkin Roberts jengjong adeibanga na anatoh lhumsah kit lou u ahi. Hiche akhohna hi tulaija eihon thiltampia ichenkhompiu sopi dangho nung i-del lo uva, lamkai pha ineidoh thei nailou u hi ahi. Chuban kit leh, ilah uva denomination tampi aumdoh jong ahikit e. Hichetoh kimat, 1990 vel’a chileh nam kithetna jeh in apu-bei kelngoi bangin muntin ah ina kithecheh kit taovin ahi.

Hitobang laija mijousen kitohtah a Pathen ahoukhom natheiding Kuki Worship Service ahung umdoh hi Pathen vaihopthep akimudoh nakhat ahi. Hiche chungchon a, lungmongsela Pathen hou nathei ding Hou-In ineidoh kit uhi vangbohna chungchon ahikit e. Hiche hi akivet phatleh Israelte gamthip-gamgo laia avacheh laiuva Pathen in sunleh Meilhanga, janleh Meikong a apui toh akilouji in, Pathen phatna thangvah chimding ahipoi.

KWSG in Hou-In aneidoh nungin jong Israelte toh ikilo nao aumjing nalaije – hichu achesa haimilou ding tihi ahi. Israelte gamtepgam alhunjou uva aboldiu khoh pen khat chu, soh leh sal’a atan laiuva Pathen in ahin puidoh uva, namkhat a asemdoh u hetjing ding chu ahi. Hiche jeha chu tuchan geija Kalchuh kut leh kut dang dang amanijng nah lai u ahi. KWSG member ho leh hiche simjouse’n i-haimil loudiu chu, achesa a Pathen in ina puina houleh, chutobanga igenthei laitah uva Ama lam holna a, Ama houding itupjeh uva KWS ina semdoh uva, chuche chungchon a hiche Hou-In jong ana kisah doh hi ahi. KWSG Hou-In hi Pathen lungmonga ihou nomjeh uva kisadoh ahi. Hiche hi Pathen houna/nading Inn ahi. Hiche hi ihetjing uva, a Hou-In leh asunga umho chunga thuneiding sanga Pathen hou hi thupijo ahi ti hea ipan detjing uleh, hiche chun hiche Hou-In hi ahin dinlhum sahthei ding ahi.

Rev J Lamboi Haokip University of Aberdeen, UK 28 September 2010