Bethesda-Khankho Foundation

Myanmar gam a Thadou-Kuki Pioneer Mission Natoh Phabep (Thadou-Kuki)

By Canon Dr David T Haokip

THUMAKAI:

Hiche Thadou-Kuki Pioneer Mission kiti hi Pu Revd Watkin Roberts in ana phudoh ahi. Ama hi Britain gam, Caernarfon kho a kon ahin, 1907 kum’a kumsih a kibol Keswick Convention a agapanna a Pathen kouna (calling) hungchang ahi. Convention sung, nilhah khat Dr Fraser in Assam gama Mission natoh na report agangai leh hungtha nom doh ahi. Chujou a Dr Fraser toh Assam gam sunga anaum Lusei Hills kiti tua Mizoram a missionary a hung ahi.

Nikhat hi Aizawl a anatohna mun ah sangkhol vom ki-ah mikhat ahungin, hiche pachun Manipur gam Senvon kho a kon kahin, keiho gam ah kipana thupha Gospel koiman aseikha naipoi atile Pu Watkin Roberts chu alunglut lhehin, Lusei pao a kijih John Kipa Thupha lekhabu khat apen, nakhou va haosa pa anapen ati. Hiche a kon a chu Manipur gam Senvon kho mite henga kipana thupha seiding hung thanom pan ahi. Pu Watkin Roberts chu Lusei Christian lamkai phabep toh 1910 February 13 nin Senvon kho ahunglhun taove. Hiche a kon chun Senvon leh avela um khoho ah kipana thupha aseiphong panun ahi.

THADOU-kUKI PIONEER MISSION HUNGKI PHUDOH (1910):

Hiche Mission kipat kum hi 1913 tia sun loi aumvang in, 1910 joh hidin kagel e. Ajehchu, Thado-Kuki Pioneer Mission Official document khat a hitihin akisun e "On November 29th 1910 Dr and Mrs Fraser and Mr Roberts started on a journey of about 500 miles to the Khasia Hills. They stayed a few days at Silchar as the guests of the Rev and Mrs T.W. Rreese. At the request of Mr Reese, Mr Roberts spoke in English of the new Thado-Kuki work, Mrs Reese being the interpreter" The Thado-Kookie Pioneer Mission Official Statement, p. 3, CMA 27, 318, preserved at National Library of Wales, Aberystwyth. Hiche ban ah, Dr Fraser in Oct 13, 1911 nichun Rev Reese letter athot in, hitin asei e, "I am enclosing a letter re the Thado-Kuki Pioneer Mission" ati in ahi. Hicheho hi akivet leh 1910 February lha a Senvon achejou uva, hiche kum mama a Thadou-Kuki Pioneer Mission hi Pu Watkin Roberts hin aphudoh pai hidingin aum e. Akisemdoh nikho tah akihetlou vangin, 1913 tisanga, 1910 kum johdingin akimui. Chule Senvon kho aga kholjin jou-u kum ni sungin {1912} houbung khat aum dohtan ahi. Mission natoh lung-gel leh pohnat nanei jing, chule Kukite ngailu tah Pu Watkin Roberts lamkai nan hiche gamkai Southern Manipur (tutua Churachandpur District) a Pathen natoh nadinga “Thadou-Kuki Pioneer Mission {TKPM}” kiti hi 1910 kuma ahin phutdoh a, Pu Dala chu Aizawl akon Field Superintendent din ahinsol uvin ahi.

Chule kum 18 chan (1910-1928) hiche minhin Kukite lhagao huhhing nadin Manipur leh avel a um gam ho (Burma, Tripura, Chittagong Hills Tracts) ah mission na atongun ahi. Mission natoh akhan toudungjui chun TKPM in ahop jou tapon 1928 kum in North East India General Mission (NEIGM) in akhel tauve. Hiche NEIGM chu tun Evangelical Congregational Church of India (ECCI) akiti tai.

MYANMAR GAM'A MISSION NATOHNA:

(A) Homalin Area: Pathenin Pu Watkin Roberts ponpan naleh taohatna asangin, Thadou-Kuki Pioneer Mission in Manipur gam seh hilou vin, Tripura ah um Kuki hodin 1916 kumin missionary asolun, chule Chittagong Hills Tracts (tutua Bangaladesh) a um Kuki ho {Bawm, Mru, Kyang, Lusei and Khumi) din 1918 kumin missionary khat asolthei un ahi. Chutabang machun a natong lamkai len Revd Edwin Rolands in, Anglo-Kuki War (1917-1919) majep chun, Burma gam; Kabaw Valley, Upper Chindwin leh Kachin gamho a mission natoh nadin lunggel nei in Britain a um mission head quarter ah hetsah na anei in ahi ti thu record ho a akimu e. Chujou in 1920 velhin Kabaw Valley visit agabol e akiti.

Record kimudungjui in, Thado-Kuki Pioneer Mission in 1919 January 1st nin, Pu Aikila hi Assistant Field Superintendent in Homalin gamkai, Upper Chindwin District ah ana solun ahi. Hiche lai chun Thadou-Kuki kho 38 aum e akiti. Vangset umtah chun Pu Aikila chu 1921 kum November ahungkon dohna Manipur, Bungpilawn kho akile kit tai. Pu Aikila chun report abolna ah khotin a Mission natoh patding anatin ahin, aki nungle phat in, aban jop aum thei tapoi.

(B) Kabaw Valley Area: Chule Manipur a konin Pu Aikila, Pu Thangnuaia, Pu Thanpara, Pu Paokhosei leh Pu Dengkunga ho Kabaw Velley ah mission natongdin ahung lhungun, date 22/01/1925 nin, Nankala kholui mun ah taokhomna anei un ahiti jong akimui. Ama ho natoh jalin mi 26 in Pathen a hinhou un, amasapen chu Pi Tothammi akiti.

Kum 1926 in Pu Paokhosei chu Kampat a asolun, Pu Thangpana chu Kontong ah asol uve. Mission natoh amachal jihin hiche kuma chun, Pu Liandawla, Kamliana leh Khawmanga chu Tamu gamkai ah akisol be in ahi. Boina jat chomchom jihin lamkai dangho akile tauvin, Pu Dengkunga in atongjom jinge. India leh Burma in Independent mujou, kilento najong ahung hahsatan, 1954 June 15 (Wednesday) nin Pathen houchangse chu Pu Dengkunga lamkai nan Upper Burma Methodist Houbung ajop tauve akiti.

(C) Kachin State leh Pastor Raltawna: Kabaw Valley leh Upper Chindwin District gamkai seh hilou vin, Thadou-Kuki Pioneer Mission in Kachin gam a jong Pu Raltawna leh a inneipi Tawngkungi chu 1923 kum chun ansolun ahi. Pastor Raltawna hi 1901 vela Lusei Hills, Khodungpui a peng ahin, First World War lai chun pao-le (interpreter) in France gamchan aga chen ahi. Gal kichai jou, ahungkile chun Thadou-Kuki Pioneer Mission in Calcutta ah Press Manager Training in anasol un, Ama tahin Calcutta kon Printing Press chu ahin polut e jong akitin, amahi lekha themtah jong ahi akiti.

Chule Lusei Hills, Hmawngjal kho a Pi Tawngkungi toh 1921 kumin akichengin ahi. 1922 kumin chapa Rualkhuma anei honin, chujou 1923 kumin Kachin gam a missionary a che tai. Mipontho tah ahin, gam akholjingjeng e akiti, gamkhol a che kahin, achapa anina Ralkhama in athisen in, aloinu Pi Tawngkungi chun, kolai ding changnei lou in, agam miho sumtha alan, achapa ngaitah chu avui tai akiti. Pastor Raltawna in Kachin gam anatoh namun chu Kamaing ahin, BCMS (Crosslinks) kiti Anglican Mission Society, Hukong Valley, gam a missionary Revd G Rowland (London a anacheng) chun kaja khai atie. Tuhin hiche Kamaing chu District HQ Town ahitan, Christian tam tah jong aumtai. Kamaing gamkai a miphabep Christian ahiu khu Thadou-Kuki Pioneer Mission jal ahin, hetjing angai e.

Kum phabep Kachin gam’a missionary ahi jou in, Manipur ahungki le kit in, Bijang, Lamka khopi ah houbung aphutdoh in, Pastor masan pen jong ahitai. Tua Bijang ECA Houbung khu ahi. Vangset umtah in Japan gal lai chun Japan sepai hon achapa Rualkhuma le houbung member phabep toh akap lihtha tauve. Athini gei-in Bijang Houbung ah Pastor in apang e.

SOUTHERN MANIPUR HOUBUNGHON TONG JOMJING:

Adeh a Churachandpur District sung a um houbung hokhu Thadou-Kuki Pioneer Mission akon ga (fruits) ahiuvin, itih chen hijongle TKPM thusim hi akichin jingdiu aphai. 2010 chun Centenary anei un, Southern Manipur Gospel Centenary ative, Revd Dr Jangkholam Haokip in “Houbung Kithah Pat (2011)” lekhabu sunga hiche Centenary chu “Kuki Mission 2010” tiding johahi ati khu ken jong dih kasa e. Chule hiche Churachandur District sung aum Christian hon Burma gam a mission na atohpat nau min “Thadou-Kuki Pioneer Mission” ahijong hi hetjing angai e.

Myanmar gam ah, Houbung jatchomchom {vetsahnan ECC (Paite), EAC(Hmar), MCO (Vaiphei), ECA (Thadou-Kuki) chule ESC (Gangte), etc} in Mission na atong ahi. Keima het Evangelical Churches Association {ECA} Houbung in atohjomjing na neokhat kaseidoh nom e. ECA in Kabaw Valley Thadou Baptist Association {KVTBA} toh 1984 kumin Mission na atongpanun, adehin Burmese Bible Project atong un, 1994 chun kumsom lhina jong amang tauve. Tutuhin ECA in Christian Church of Myanmar (CCM) toh Mission na atongjom un ahi. Thadou-Kuki Pioneer Mission in 1919 kuma anapat chu tunigei a abanjom jingu ahi tihi aheimil lou dingu ahi.

GELDOH DINGA POIMO PHABEP:

(1) Myanmar Kuki Mission 2019: Chunga kisei banga, Burma gam a Thadou-Kuki Pioneer Mission in natoh apat nau kum 1919 hi record hoitah a nei angai in, chule research bolbe angai e. 2019 tengle kumjakhat lhina Centenary (1919-2019) mandin aphai. “Kuki Mission 2019” tidinga kilom tahjong ahi. Ajihchu Burma (Myanmar) gamkai a um eimite lah’a Thadou-Kuki Pioneer Mission hin amasapen a kipa na thupha a hinpolut ahi. Centenary bolteng le houbung, society le gamsung dia thilpha chom ding Conference ham, Seminar ham, Maicham ham bol aphai. Hiche hi “nam min” pang’a Mission masapan jong ahie. Kukite in eithusim u eiman eikisut diu ngai tai.

(2) Non-denominational leh Kukite dingbou: Pu Watkin Roberts hin Thado-Kuki Pioneer Mission ti ana phudoh hi, ivet leh “Non-denominational” min hi alan, chule hijong anahi mongding in katahsan e. Aban a Kuki chate lhaogao sochat nading leh tahsalam a khantou ding bou khohsah najala ana phutdoh ahi ti akihedohe. Denomination min pang lou mission society a abol hi thilhoi or vetjui thei tah ahi. Ajih chu ama hi Anglican or Congregational or Presbyterian Church ham hitei ding ahi. Tulai houlamkai atamjohi eima eima kaina denomination bou eikhohsah un, hijihin, kivetdana, kilungpelna, innsung leh gamsungah adim tan ahi. Pu Roberts lunggel bang a non-denominational vision nei lamkai chule lhagao mangthai ho pohnat na leh jatlenam khantou dingdei lamkai angaitai tijong temna kahin neinom e.

(4) Re-Union: Vannoi khantou dungjui-in akithe-cheh jat leh nam, chule gam (clans, ethnic group/tribes, nations) tamtah akinung khoptup gam tauve. Vetsahnan kachen nau Europe gam a: Euro zone hi 2000 kumin ahungdohin sumkhat (currency khat mankhomding) Europe gam ah Independent State kihi cheh jongle sum/currency khat mangkhom taute tin ahinsem doh tauve. Amaho (Euro zone member state ho) jong ana kigal chule anakithat to ahi bou uve. Ahin phat le nikho dungjui a, pankhom lou akhoh phat a, pankhom nathei lampi ahol uva, kiloi khom kit ahiuve. Ajehchu pankhom louva, lolhin na, thahatna (power), chule khantouna a um theipoi. Kasei dohnom chu Thadou-Kuki Pioneer Mission a kon agaho (The fruits of the Thadou_Kuki Pioneer Mission) kile suhkhom phat ahitai. Houbung khatseh in um taute tijong ahi dehpoi, keimu danin federation or federalism hi base bola, Kuki chate dimun toh kitoh, chon dan leh tahsan dan ho toh kibang a umkhom thei nading or kigopkhom theina “body” khat nei angaitai, chule clans, ethnic group jouse, le houbung ho semhoi/semphat angai tai kati ahi.

(5) Phungle chang kithet hi chonset ahi: Eimite (Kukite/Chin/Zomi) hi abangle Pathen thu/lhagao thu sangin phungle chang eikhohsah jiun ahi. Hiche hi “racism” akitin, Bible thutoh kikal chule van-noi a hot umpen jong ahi. Phung le chang ngailut val or kithet (racism) hi chonset lenpen khat jong ahi tihi het angaie. Ahi theina chan in Pathen thu joh hatsah a kipunkhom ding, kithu ngaiding, kilungset ding joh gel uhiute. Thadou-Kuki Pioneer Mission in ana doi thupi pen jong chu lhagao mangthai ho le nam khantou nading anati chu hetjing uhiute.

Pu Watkin Roberts thusim chomcha: Eimi lhagao huhhing nadia ahinkho, anei agou hinpedoh a Mission hinphut doh ahijihin athusim chomcha kahin jihe. Amahi 21st September 1886 kum’a Carvaervon, North Wales a anapeng ahin, kum 22 alhinbep a Pathen a kon kouna chang ahi, 14th October 1908 in England a kon ahungkipat dohin, 9th December a India gam a hunglhunge akiti. Gollhang cha ahi jihin Pu Tlangval tin anakihei. Chule February 1957 kum in Lakhipur, India a Church Council meeting’a ahungchu anukhahpen India gam akholjin na ahitai. April 20, 1967 kum in, achen na khopi Toronto, Canada gam ah aleiset hinkho abeitai.

THUCHAINA:

Pu Watkin Roberts in ana phudoh Thadou-Kuki Pioneer Mission a kon, houbung tamtah chule mihem simsen lou-in, kipana thupha akisan a huhhingna achan jalin, Pathen thangvah uhiute. Hiche mina North East India, Bangladesh chule Myanmar a um Kuki chate lah a kipana thupha sei na masapen ahi bangin, tunjong Pathen a kon kilungtona leh kipumkhat nadin Myanmar gam a um hon {chule India leh Bangladesh a um Kuki chate ho toh} Centenary (Kuki Mission 2019) mangkhom kit angai’e tintemna kahin neiuve. Hiche a kon Independent State chomchom kicheng jongle programme man khoma, kilungset na leh kingailutna punsah ding angai e. Adehin lekha them scholar ho in gelkhoh u hen, research bolbeu leh hoidi ahi.

Achainan hiche TKPM mina (1910-1928) kumsunga lhacha a anapang ache masaho jouse geldohjing/hetjing angai-in ahi. Chule lungkhat, thakhat, minkhat a, a na kiloikhom na hou jong geldoh jingu hiutin, houbung semphat/semhoi na, jat le nam kisemphat nan mang taute.

REFERENCE:

Buiting, Thimkup The Advent of Christianity among the Bawm People, from www.bawm.info (2011)

Haokip, Jangkholam 2011 Houbung Kithah Pat (Re-visioning the Church for the post Centennial witness for Christ), Glasgow.

Jeyaseelan, L. 1996 Impact of the Missionary Movement in Manipur, New Delhi.

Darkness to Light 2010, Southern Manipur Gospel Centenary Souvenir, Churachandpur, Manipur.

ECA Golden Jubilee (1953-2002) Souvenir 2002, Lamka, Manipur

Platinum Celebration Souvenir 2010, ECA Church, Bijang, Lamka 2010.

Silver Jubilee Magazine 2003, Jireh AOG Church (1978-2003), Tamu, Myanmar.

The Thado-Kookie Pioneer Mission Official Statements and Files, National Library of Wales, Aberystwyth, Wales.

NOTES:

The writer is Senior Minister (Vicar) of St George’s Parish Church of England, London www.st-georges.ik.com and Hon. Pastor for Kuki Worship Service, London www.kwslondon.com

Hiche article kajih’a eiki thopi Revd Dr J Lamboi Haokip chunga kipathu kaphong e.

NB - Article received from the author on 20.01.2012